obustan Dövlət Tarixi – Bədii Qoruğunun Let’s Gobustan layihəsi ilə birgə Memar Elvin Əliyev və Memarlar Klubu olaraq mən, Urfan Məmmədov 8 oktyabr, 2016-cı ildə “Litosfer” adlı təlim keçirdik. Təlimin məqsədi landşaft və onun təbii detallarını daha yaxından öyrənmək, onları hiss etmək və Qobustanın qədim enerjisini sinəmizə çəkmək idi.
Elvin Əliyev Rocks and Metals layihəsi ilə vizualizasiya sahəsində bir addım daha inkşaf edərək, Memarlıq obyekti ilə bütün landşaft elementlərini komputer qrafikası ilə vizuallaşdırdı.
Layihənin renderləri ilə daha geniş bu keçiddə tanış ola bilərsiniz. Layihəni ölkə üzrə bu səviyyədə ilk iş adlandırmaq olar. Bu səbəbdən müəllif 1 ilə yaxın üzərində işlədiyi layihədən qazandığı təcrübəni gənclərlə, yeni başlayanlarla və peşəkarlarla bölüşmək qərarına gəldi. Bunun üçün Qobustan əla məkan idi.
Vizual olaraq qayaların, bitki qatının necə ərsəyə gəlməsini, ümumilikdə yaradıcılıq prosesinin necə inkşaf etdiyini iştirakçılarla bölüşən Elvindən sonra Qobustan qayalıqlarında yürüş etdik.
Artıq qayalara, daşlara baxış bir qədər fərqli idi. Bunun ardından həmin landşaftın beyinlərə həkk olunması üçün eskiz məşğələsi keçdim.
Təəssüf ki, vaxt azlığından lazımi qədər bu məşğələnin üzərində işləyə bilmədik. Bu səbəbdən sürətli eskiz adlanan metoddan istifadə edərək “Forma və Faktura” adlı məşğələni başa vurduq. Məqsəd landşaftda bir fraqment tutub, oradakı qayalığın siluetini-formasını çəkmək və fakturasını kömürlə hiss etdirmək idi. Burada mütənasiblik, işıq-kölgə, forma və faktura əsas prioritet idi.
Ardından qədim məkanda tonqal qalayıb ətrafında bir neçə saatlıq məskən saldıq.
Daha əvvəl Memarlar Klubu olaraq Şəkidə keçirdiyimiz workshopdan sonra bu formatda ilk tədbirin məqsədi gənclərimizə yeni biliklər verib eyni zamanda dəyərlərimizlə yaxından tanış etmək idi. Artıq növbəti təcrübədən sonra bu tip workshopların tez-tez keçirilməsi planlaşdırılır. Növbəti dəfə üçün elanlarımızı gözləyin ki, qeydiyyatdan keçib təlimlərimizə qoşulasınız.
QEYD: təlimin keçirilməsində göstərdiyi bütün köməkliyə görə başda Cavad Əfəndi olmaqla Qobustan Qoruğunun Let’s Gobustan layihəsinə təşəkkür edirik.